ചാൾസ് രാജാവുമൊത്ത് ഒരു വിരുന്ന് ; മലയാളി നഴ്സിന് കിട്ടിയ അവസരം അമൂല്യം
കൊച്ചി: യു.കെയില് സേവനം അനുഷ്ടിക്കുന്ന നഴ്സുമാര്ക്കും മിഡ് വൈഫുമാര്ക്കും ചാള്സ് രാജാവ് ബക്കിങ്ഹാം കൊട്ടാരത്തില് ഒരുക്കിയ വിരുന്ന് സല്ക്കാരത്തില് പങ്കെടുക്കാന് യു.കെയിലെ മലയാളി നഴ്സിന് അവസരം ലഭിച്ചു. ചാള്സ് രാജാവിന്റെ ജന്മദിനമായ ഈ മാസം 14-നാണ് വിരുന്നൊരുക്കിയത്. ബക്കിങ്ഹാംഷയര് ഹെല്ത്ത്കെയര് എന്.എച്ച്.എസ്. ട്രസ്റ്റില് സേവനം അനുഷ്ഠിക്കുന്ന ചെങ്ങന്നൂര് സ്വദേശി ആശ മാത്യുവിനാണ് ഈ അംഗീകാരം ലഭിച്ചത്. ബക്കിങ്ഹാംഷയര് ട്രസ്റ്റ് കാന്സര് കെയര്, ഹീമറ്റോളജി വിഭാഗത്തിലെ സര്വീസ് ലീഡ് ആന്ഡ് അഡ്വാന്സ്ഡ് നഴ്സ് പ്രാക്ടീഷ്ണറാണ് ആശ. ഈ ട്രസ്റ്റിലെ വിദേശ റിക്രൂട്ട്മെന്റില് സജീവ സാന്നിധ്യമായ ആശ, പുതിയതായി വരുന്ന ഇന്ത്യന് നഴ്സുമാരുടെ മെന്റോര് കൂടിയാണ്. ചാള്സ് രാജാവിനെ നേരില് കാണാനും സംസാരിക്കാനും കഴിഞ്ഞത് വലിയ ഭാഗമായി കരുതുന്നുവെന്ന് ആശ മാത്യു പറഞ്ഞു.
കേരളത്തില് നിന്നാണെന്ന് പറഞ്ഞപ്പോള് തന്റെ ഒരു ജന്മദിനം കേരളത്തിലായിരുന്നുവെന്ന് രാജാവ് പറഞ്ഞതായി ആശ പറഞ്ഞു. സേവന മികവിനുള്ള അംഗീകാരമായി ആശയ്ക്ക് നേരത്തെ ചീഫ് നഴ്സിംഗ് ഓഫീസര് (സി.എന്.ഒ) ഓഫ് ഇംഗ്ലണ്ട് സില്വര് അവാര്ഡ് ലഭിച്ചിരുന്നു. ഭര്ത്താവ് ജോണ് നൈനാന്, മകന് കെവിനുമൊപ്പം ഇംഗ്ലണ്ടില് ഹൈവിക്കമിലാണ് ആശ താമസിക്കുന്നത്.
എട്ടാം വയസില് തലച്ചോറിലെ കാന്സറിനോട് പൊരുതി കീഴടങ്ങിയ രണ്ടാമത്തെ മകന് റയാന്റെ ഓര്മക്കായി കാന്സര് ബാധിതരായ കുട്ടികളെ സഹായിക്കാനായി ആശ മാത്യു, റയാന് നൈനാന് ചില്ഡ്രന്സ് ചാരിറ്റി എന്ന സന്നദ്ധ സംഘടനയ്ക്ക് നേതൃത്വം നല്കുന്നുണ്ട്.
തിരുവനന്തപുരം ആര്.സി.സി. ഉള്പ്പെടെ ഇന്ത്യയിലെയും യുകെയിലെയും ക്യാന്സര് ബാധിതരായ കുട്ടികള്ക്ക് സഹായം എത്തിക്കാന് ആര്.എന്.സി.സിക്ക് കഴിഞ്ഞിട്ടുണ്ട്.
