റാന്നി പെരുനാട് വയറൻ മരുതി അമ്പലം വക സ്ഥലത്തെ 35 അടി ഉയരമുള്ള തെങ്ങിൽ കുടുങ്ങിയ 19 വയസ്സുള്ള യുവാവിനെ ഫയർഫോഴ്സ് സാഹസികമായി താഴെയെത്തിച്ചു. പെരുനാട് പഞ്ചായത്തിലെ 12-ാം വാർഡിലാണ് സംഭവം. ബുധൻ രാവിലെ 7.40-ഓടെയാണ് അബി എന്ന യുവാവ് തെങ്ങുകയറുന്നതിനിടെ അവശനായി മുകളിൽ കുടുങ്ങിയത്. ഇറങ്ങാൻ കഴിയാതെ അവശനായതോടെ നാട്ടുകാർ ഫയർഫോഴ്സിനെ വിവരമറിയിച്ചു. റാന്നിയിൽ നിന്നെത്തിയ ഫയർഫോഴ്സ് സംഘം ലാഡർ ഉപയോഗിച്ച് തെങ്ങിൻ്റെ മുകളിലെത്തി.അസിസ്റ്റൻ്റ് സ്റ്റേഷൻ ഓഫീസർ സജീവിൻ്റെ നേതൃത്വത്തിൽ നടന്ന രക്ഷാപ്രവർത്തനത്തിൽ, യുവാവിനെ സുരക്ഷിതമായി താഴെയെത്തിക്കാൻ കഴിഞ്ഞു. ഇതോടെ പ്രദേശവാസികൾക്കും ഫയർഫോഴ്സിനും നന്ദി അറിയിച്ചു. യുവാവിൻ്റെ ആരോഗ്യനില തൃപ്തികരമാണ്
